തിരുവനന്തപുരം:ഡോ.സുകുമാര്‍ അഴീക്കോടിന്റെ നിര്യാണത്തോടെ വ്യക്തിപരമായി വളരെ അടുത്ത സുഹൃത്തിനെയാണ് നഷ്ടപ്പെട്ടതെന്ന് പ്രതിപക്ഷനേതാവ് വി. എസ് അച്യുതാനന്ദന്‍ അനുസ്മരിച്ചു.
അനീതിക്കെതിരെ സ്വന്തം നിലയ്ക്കുതന്നെ ഒരു പ്രസ്ഥാനമായിരുന്നു അഴീക്കോട്. സ്വന്തം നിലപാട് നിര്‍ഭയം പ്രകടിപ്പിക്കുകയും എതിര്‍പ്പുകളെ ശക്തമായി ആക്രമിച്ചു തകര്‍ക്കുകയും ചെയ്ത പോരാളിയായിരുന്നു അദ്ദേഹം. നീതിക്കുവേണ്ടിയുള്ള സിംഹഗര്‍ജനങ്ങളായിരുന്നു അഴീക്കോടിന്റെ പ്രസംഗങ്ങള്‍.
മുരത്ത കമ്മ്യൂണിസ്റ്റ് വിരുദ്ധനും കോണ്‍ഗ്രസിന്റെ ശക്തനായ വക്താവുമായിരുന്ന അഴീക്കോട് അടിയന്തരാവസ്ഥാനന്തരം കോണ്‍ഗ്രസിന്റെ തനിനിറം മനസ്സിലാക്കി ഇടതുപക്ഷത്തിന്റെയും സി.പി. എമ്മിന്റെയും ബന്ധുവും അഭ്യുദയാകാംക്ഷിയുമായി മാറി. വര്‍ഗീയതയ്ക്കും ആഗോളവല്‍ക്കരണ സാമ്പത്തിക നയങ്ങള്‍ക്കും സാംസ്കാരിക ജീര്‍ണതകള്‍ക്കും വിദ്യാഭ്യാസ കച്ചവടത്തിനുമെതിരെ ശക്തമായ ആശയസമരമാണദ്ദേഹം നടത്തിയത്. സാഹിത്യനിരൂപകന്‍, ഉത്പതിഷ്ണുവായ സാംസ്കാരിക നായകന്‍, രാഷ്ട്രീയ ചിന്തകന്‍, സര്‍വോപരി മഹാനായ പ്രഭാഷകന്‍ എന്നീ നിലകളിലെല്ലാം തലമുറകള്‍ അഴീക്കോടിനെ ഓര്‍ക്കുമെന്ന് വി. എസ് പറഞ്ഞു.
No comments:
Post a Comment